CCXLVII.

1360, December 6. Patschkau.

Notariatsinstrument über die Schenkung des Dorfes Schlottendorf und des Waldes Nydek an das Kloster.

In nomine domini amen. Anno nativitatis eiusdem M°. CCC°. LX°. indictione XIIII. VIII. Ydus Decembris in opido Paczkow in domo habitationis strennui militis, domini Petri Santkonis hora vespertina in mei notarii et testium subscriptorum ad hoc specialiter vocatorum presentia idem dominus Petrus de villa Slobotendorf, quam ex gracia domini Theodorici pie memorie quondam abbatis monasterii Kamencz suique conventus sibi ab eisdem concessam dumtaxat ad tempora vite sue possidendam habuerat, insuper de silva Nydek in suis antiquis greniciis limitata, quam retroactis temporibus intuitu pietatis et elemosine legaverat monasterio in Camencz, reservato sibi usu fructuario de dicta silva provenire valente ad tempora solummodo vite sue, non coactus nec deceptus, sed maturo prehabito suorum amicorum consilio, sana mentis corporisque valetudine, gladii sui evaginacione approbata cessit religioso viro domino Andree abbati in Camencz suoque conventui cum omnibus pertinenciis et utilitatibus suis omnemque usum fructuarium predicte silve et ipsam silvam bonis monasterii appropriari et incorporari desiderans ab eis cedendo ipsi monasterio sub expressa condicione, ob salutem suorum progenitorum suique ac heredum suorum perpetuis temporibus possidendam iure hereditario assignavit. Super et de quibus prenotatis Rudigerus et Philippus, filii predicti domini Petri, presentes per prefatum dominum . . abbatem requisiti, factum patris approbantes in idipsum deliberacione matura prehabita consenserunt et pro aliis fratribus, videlicet Petro et Otthone absentibus, necnon Johanne et Nycolao nondum annos pubertatis seu discrecionis habentibus, ut et ipsi omnia et singula prescripta rata et firma teneant una eum patre pepegerunt. Insuper promiserunt prelibato domino . . abbati omnia et singula prenarrata coram nobili domina, domina Agnethe ducissa de Monsterberg seu filio eius domino Bulchone replicare seu iterare tempore congruenti. Preterea prefatus dominus Petrus Santkonis adiecit, quod ipso mortuo domini . . de Camencz ad exsequias peragendas duos pannos sericeos et unum Ianeum pulcrum de VI ulnis nec non duos lapides cere pro candelis pro funere sepeliendo suis sumptibus comparabunt hominibusque funus ad claustrum conducentibus et in exsequiis perseverantibus de expensis providebunt. Et hanc ultimam suam disposicionem ac voluntatem sepedictus dominus Petrus filiis suis predictis admittentibus vult valere iure, quo valere poterit meliori. Actum anno, indictione, mense, die, loco et hora, quibus supra; presentibus strennuis viris: domino Johanne de Bebyrsteyn milite, Theodorico Runge, Peczkone Eyke, necnon Petro Longo et Johanne Longo civibus in Paczkow et aliis fidedignis testibus ad premissa.
Signum notarii.
Et ego Cunradus quondam Philippi de Nyza, clericus Wrat. dyocesis, publicus auctoritate imperiali notarius predictis omnibus et singulis, dum sic, ut premittitur, agerentur, una cum prenominatis testibus presens interfui et ea rogatus per prenominatum dominum . . abbatem in hanc formam publicam redigens conscripsi meoque nomine et signo consuetis in premissorum testimonium consignavi.

Or. Perg. Eine vermuthlich noch gleichzeitige Hand schrieb auf die Rückseite: Cessio domini Petri Santkonis de Slavatyndorf et silva Neydek.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.